Ik begreep det alle fanclublaeje ein berichje hebbe gekreege met 't adres van deze site, en de's te merke auk want de bezeukersaantalle zien verdöbbeld. Eigelik waas de site allein veur mien vriendjes en vriendinnetjes, maar dit is auk waal tof, zeker umdet ik ôg noow kin vraoge um mei te dinke euver de nieje theatershow!
Ôs nieje theatershow geit euver 'Vergaete plaatse'. Det kin van alles zien: ein kruutsbeeldje örges naeve de waeg, ein wei waose as kind gevoetbald hes, enne lillike slaagbaum beej enne euverwaeg; alles meug - as d'r maar ein moëit verhaol aanzit. Det verhaol môtte enne 'geschiedenis' zien, maar alle persoënlikke verhaole zien eigelik auk geschiedenisse. 't Meug varieere van waose diene iërste lover hes gekös, waose waas wie de Berliénse moor veel, waose enne kiër enne vos enne haas hes zeen vange, tot
wao Napoleon oéit gewandeld haet, wao de Pruuse de grens euver kwaame en de Spanjaarde ein kanaal gegraave hebbe.
Kortum: persoënlikke of algemeine geschiedenis, gekoppeld aan ein plaats in Limburg.
't Hoof neet hoëgdravend te zien, ein klein verhäölke is dök al zat.
Van de moëiste van ôg verhäölkes euver vergaete plekke maak ik leedjes. Daorumhaer bouwe we ein theaterstök getiteld de 'Reddende Waeg'. De bedoeling is met die leedjes ôg vergaete plekke oét de vergaetelheid te redden.
Graaf ens in ôg geheuge, kiék in ôg eige umgaeving rônd en mail mich ôg verhaole. Doot det nao de beheerser van deze site: UMBERTOCASTOR@LIVE.NL.
Alfes bedank!
Frans in New York