De Venlonaer

Lasergedeuns

Weer thoés. Toch nog ein joeksig filmpke: laser show

Take me out to the ballgame

We zien nao 't hônkballe gewaes! Kaertjes op straot gekoch en toen op tiéd nao 't stadion, bliek det de meiste Amerikane pas halverwaege de wedstrijd
binnekômme en dan veural bezig zien met rôndkiéke, bikke, drinke, bikke, bikke en rôndkiéke en aaf en toe ens juiche - veural asse in beeld kômme op 't groëte scherm beej ein van de joeksige spelkes tösse de innings door. Ein hiele belaefenis!

M&Maud

Ein van de groëtste culturele attracties van gans New York is netuurlik, det weit ge, de M&M-winkel. Neet allein kriegse dao alles van M&M, maar de kriegs d'r auk nog ens alles van M&M. Veur kinder is d'r ein 'M&M Scan Your Color'-apparaat. Kinse laote oétzeuke in welke kleur M&M's desse zin hes. Netuurlik môsse dao langk in de riej veur staon, maar det had M&Maud d'r gaer veur euver!

Maud Hilton

Aafgelaupe zaoterdaag kwaam Maud, 40 minute iérder as gepland, maar zônder zien 2 kôffers die verdweene zien beej 't inchecke, aan in New York. Det Maud tot de Ruiverse Jet-Set behuurt, bliek waal oét 't volgende filmpke:

Good niejs veur Cielke!

Good niejs veur Cielke det de aafgelaupe daag veur zich zelf haet môtte kaoke en zien eige vot haet môtte aafvaege: pap en mam Stikkelebôks zien alweer vertrokke oét New York!

Niejste van 't niejste

Sinds kort is d'r iets niejs op 't gebied van snacks. Superblits. Superhip. Superhendig.

Meryl Streep in mien straot!

Wie ik vanmorge wakker woort, waare ze bezig met filmopnames veur mien deur. De ganse straot waas aafgezatte, d'r stônd ein buffet klaor en d'r leepe waal 50 man rônd. Bleek 't de film Julie & Julia te zien die in 2009 oétkump met neemus minder as Meryl Streep in de haufrol! De scène waorin Meryl Streep wien geit kaupe beej de wienwinkel is dus beej mich in de straot opgenaome! Woehoe!

Beeld zônder geluud

We woele neet in de riej staon en niks betale, dus dan is de gratis veerboët nao Staten Island 't gunstigste, en dan kumpse auk waal ein bietje in de buurt van:

Dansende Frans

Frans dans neet dök, dus as hae dans is PSV kampioen gewaore. 't Bewiés woort vandaag geleverd tiedes de huldiging van PSV, maar dan in 't Bryant Park, New York City. Ruud 'ik bin veur ajakkes' Stikkelbôks waas zoë vrintelik ein filmpke op te neeme...

Musicalletje/Niemanddalletje

Toenight zien we, zoëas zich det huurt in New York, nao de Braodwôrsmusical Chicago gewaes. De recensies waare neet euverwaegend positief, maar we hebbe ôs aevegood vermak! All that Jazzzzzzz...

Danse in Bryant Park

Wie Stik weer truuk waas woort de Waope-Stilstand beslaote, en Stik waas zelf zoë vrintelik um nog ein filmpke op te neme van enne dolgelökkige Frans (want PSV is veur de 4e kiër op riej Landskampioen gewaore en det gun ik Vertônghe, Koster, Huntegaar en Heitingaar van herte!

Winkel zônder raame en megapopulair

Örges in de buurt van Central Park leet deze belachelikke winkel. Filme moch binne neet, dus we zien aafhankelik van de recensie van winkelgoeroes Stik en Clim, en netuurlik de met gevaor veur eige laeve gemakde illegale opnames van Frans.

Jimmy Hendrix op enne CELLO. Idioot!

De cello is ein van de sjiekste instrumente van 't westelijk universum - veural de klank sniedt door alles haer. In New York, tösse Canal en Houston street, zit op einzame aovend, deze fascinerende man met zien cello tösse zien bein en speult prachtige melodieje. Vandaag waal ein hiel bijzondere repertoirekeuze veur zien doon: Jimmy Hendrix! WOOOEEEEWIEEEE!

Paus Rudolph VI

Vandaag aangekômme op JFK airport, en morge te bewondere in de vergadering van de verenigde naties: Paus Rudolph Stikkelbôks VI en zien leeftallige maîtresse Climonia. Waat ein verrassing!

Guggenheim ôntplôf!

Bin eindelik nao 't Guggenheimmuseum gewaes nao de tentoënstelling van ein of andere Chinees dae iets haet met ôntploefinge. De kins um oétnuudige op dien festival of dien feesje, en dan bouwt-e iets van buskroét en luüt det vervolges ôntploefe. En det is dan kuns. Zoë hange d'r 9 witte auto's baovenein in de hal van 't Guggenheim, asof enne auto ôntploef en de lôch invluug. Erg sjiek!

PS: Ik heb meneer de Chinees al geboek veur de oétreiking van de Loëje Lei, ein vuulbespraoke maar nog geheim niej initiatief van stichting OB de WOERS.

The Mars Bar

Ik heb ein megasjieke minikroeg ôntdek met allerlei obscure types aan de tap en ein smerige barkeepster, Rachel. De tent is verneump nao enne Mars-reep en hit The Mars Bar. 't Allerallersmerigste is netuurlik de pleej:

Spring 's in die air

Dit filmpke vônd ik nog. 't Is van aafgelaupe dônderdaag...

En dan per ôngelök toch nao enne musical...

Ik stônd ein kaertje te kaupe beej de centrale ticket-verkaup veur ein veurstelling getiteld The Fifth Column, kump d'r inens ein vrouw aangerend met dreej kaertjes veur de musical Cry-Baby. Die had zeej euver want zeej waas juffrouw van ein schoël en dreej kinder waare neet op kômme daag. Dus ik en de twië minse achter mich koste gratis nao dae musical wao ik anders noëit haer zoel zien gegaon. Zeker neet asse huurs det 't op Grease liékent, maar dan um te lache... Det zal mich waat waere dach ik. Maar ja, waal gratis in 't Nieje Marquis-Theater det ge heejnaeve op de foto zeet met superblitse lifte!

PS: nog coole ideeje opgedaon veur de Revue!
PSS: Cry Baby is oëit as film oétgebrach met Johnny Depp in de haufrol:

Op wae môtte Amerikane stumme?

De sfeer op straot wuurt allengs rauwer, naomaote we de verkeezinge in Amerika nadere. Deze man beejveurbeeld, zoë te huure auk nog eigelik ennen Ier, steit IDDEREN aovend in de buurt van Times Square, zaet normaal weinig, en hilt allein zien bord umhuüg. Jao, zoë winne we d'n oorlog waal.

Central Park in 't zunke!

Vers geproduceerd um ôg de uigskes oét te staeke: de zôn in Central Park!

Jeugsentiment, de Commodore Amiga

Wae herinnert zich neet Int Karate +3, Monkey Island, Stuntcar, Sensible Soccer en netuurlik Kick Off! Asse vruúger auk gespeuld hes met enne fantastische Amiga, MÔSSE dit filmpke zeen. En bäöke... En nao de video wetse auk weer waat d'r zoë vervaelend waas aan die alde computers: de meziék.

Dit niejs haet netuurlik niks met New York te maake, maar nao mien New York-reis blief deze site in de lôch as verzamelsite van belangriék, tof, maf dus opvallend niejs van 't web. Bookmarke dus!

Wae had dit 10 jaor geleeje gedach?

Ôngeluifelik waat we in ein paar jaor tiéd veur enne technische veuroétgangk hebbe geboek. Van Playstation 1 nao Xbox 360 is nog gen decennium, maar waat enne waereld van verschil! Internette op de tillefoon, blogge met youtube, lande op de maon, kortum: allemaol geweldig. Heej weer zô'n maf veurbeeld: Maud zit thoés in Venlo in de pyjama en ik zit in Bryant Park met mien niej Macbook. In Bryant Park hesse gratis internet. Zônder dräödjes, zônder gedoedel, Skype met Venlo vanoét hertje Manhattan:

De waorheid euver 9/11 en 11/9 en 11 september

Deze confronterende documentaire, gemak op miene spiksplinternieje MACBOOK (woehoe!) focus op enne groep koekwauze die beej Ground Zero pepeerkes staon oét te deile met alternatieve verklaoringe veur 9/11. Det ze messchien heej en dao ein punt hebbe, det Bush enne smeerlap is dae tot vuul in staot is en det d'r inderdaad ein aantal 'rare' zaake zien op te sômme rôndum 9/11, mak eur neet minder koekwaus. Vandao, de documentaire: Truth van de Koekwauze (FP Productions 2008). Geneet!

Updates later vandaag: 't 9/11-complot!

Later vandaag, naodet Frans zienen bagel met creamcheese en zien tas kôffie (Grande, zônder sôkker, met melk) op haet, volg d'r enne belangriéke niejsupdate op deze site. Ôs brônne hebbe ôs inzich gegaeve in de WAORHEID achter 9/11. En dae is schoekender as idderein verwach...
Vaerder vandaag: opnames van ein nieje superhero-film, wandele met de Hampelemanne en: Adam, de nachbraker.

Prachtige zaoterdaag!

't Is vandaag enne prachtige zaoterdaag; veurjaor, zunke, vol verwachting van waat 't weekend bringe zal. Tiéd veur ein beschouwende beejdrage. Al is de koffie erg heit.

VERBORGEN CAMERA ONTHULD: DEEL 2 ZWETENDE RUS

De collega van de dieke zweitende Rus, enne smaale zweitende Rus, leek verdach vuul op Jean-Luc Groenteman. Ik heb um, wederom met gevaor veur eige laeve of in idder geval mien oére, toch met de verborge camera gefilmp. 't Is moeilik te zeen dus gebroék ôg fantasie:

PS: Doot de groete aan John, van Johns Hairshop, as ge um zeet

VERBORGEN CAMERA ONTHULD: ZWETENDE RUS

Oétintelik koos ik dan toch, vanwaege de New York-experience en 't meltingpot-idee, veur de dieke, stinkende, zweitende Rus met ein scheif aug (wao hae zich met de schiér in gestaoke had) dae nog ein bietje nao de wokda rook. Vanônder de beschermende hoes euver mien kleier haer bin ik d'r met gevaor veur eige laeve in geslaag de volgende cônfronteerende opnames te maake van miene kapper:

Walhalla veur kinder

De Hemel op Aerd veur idderein ônder de 12 is Toys R Us op Times Square. Vergeleke met Geerlings in Bliérick, Van Staavere in Bliérick, Geerlings in Venlo, Lang en Dreesse in Venlo en zelfs Van Enckevort vruúger in Bliérick is dit Da Shit. Waat enne waanzinnige speulgoodwinkel is det (met computerspelkes!). De kriegs dao Tyrannosaurus Rex-e, Empire State Buildings en net nao sloétingstiéd woort dao dit speulgoodautootje nao binne gerdraage um d'n daag daonao te waere verkoch. Ik wil neet weite wievuul det môt koste...

Ter vergeliéking:

The creditcard has arrived

't Haet ef gedeurd en Maudje haet de maze van de Nederlandse wet môtte vinde, we hebbe de Amerikaanse douane môtte umzeile en met gevaor veur eige laeve ôszelf môtte euvertreffe - maar mien redding is gearriveerd:

Danke Maud x

MacBeth in veer filmpkes

Dinsdaagaovend bin ik nao ein oétvoering van Shakespeares Macbeth gewaes, in ein van die ruige theaters rônd Broadway. In de hoofrol Patrick Stewart dae ge messchien kint as Kapitein Jean-Luc Picard van starship Enterprise. Noow speulde hae dus de generaal Macbeth dae aangetrokke wuurt door de mach en veural door zien doordravende vrouw de keuning vermoord en zelf keuning wuurt. Maar zien geweite speult um parte...

't Patserige theater zoog d'r ôngeviér zoë oét: ('t waas verbaoje um binne te filme)

Deze hilarische saamevatting van Macbeth in 2 minute guuf aan wao 't stök euver geit. Veur de gooje orde: dit is neet de versie die ik gezeen heb...

En dan, nao 180 minuute, eine kleine truukblik op waat Kapitein Jean-Luc Picard ôs haet gebrach: